الولد بصفته ولد مستفيد من تمييز المجتمع ليه فمثلاً مهما كان رأيه في المساواة أكيد هيبقى مبسوط من إنه مش مضطر إنه يغسل المواعين حتى لو شايف إن مفيش مبرر إن البنات هي إلي تشيل شغل البيت كله -خصوصاً إنهم ليهم تقريباً نفس المشاغل بتاعت الراجل دلوقتي وإن كانت أقل كماً - 

رغم إن سيطرة الراجل على مراته وتحويلها ل submissive housewife أكيد هيبقى أريح للراجل بس أظن الإنسان الطبيعي عمره ما هيحب كدة - مش علشان المبادئ والقيم والحرية والنسوية-. لكن علشان هو بيحب مراته ومش هيحب إنها تكون مقموعة أو على غير طبيعتها .. أو من منظور أكتر ذاتية هو حب البنت المهتمة بنفسها الي بيستظرف كلامها إلي ليها إهتمامات مشتركة معاه الخ
فأكيد هيضايق من خفوت الصفات -أو شخصية البنت نفسها- دي لحساب الإهتمام الزيادة عن المطلوب بالبيت وبيه

أي شخص محتاج نوع من الشغل عشان يشبع الرغبة في الإنجاز ويحس بأهميته .. الست لما تسيب الشغل وتتفرغ للبيت تماماً مبتقدرش بتفتقد الحاجات دي -غالباً مبيبقاش متاح ليها حتى الخروج مع صحابها أو المشاركة كفاية في أي حاجة إجتماعية تعوضها - فبتبقى متسلطة في البيت وتتحول لست نكدية أكتر عكس المتوقع إنها هتبقى مهتمة أكتر بالبيت وهتريح جوزها أكتر

بس في الحقيقة الموضوع ده ليه مميزات كتيرة للراجل وأريح ليه -وأحياناً كمان بيبقى معاه حق تماماً في طلب تضحيات من مراته - .. وأي حد بيدور على راحته وتلقائياً بيضغط على البنت ويحاول يستريح على حسابها .. البنت لازم تدافع عن شخصيتها بنفسها

عشان كدة في فيلم Before Midnight بعد ما Celine قالت :

"You know what my secret fear is ? With every man? Is that they all want to turn me into a submissive housewife."

لما Jesse رد عليها :

" Okay, no one could EVER do that, all right? I promise, it would be easier to fit your head into a toaster than to turn you into anything submissive. "

دايماً بتخيله بيرد بفخر وإطمئنان مش غضب أو ضيق

في النهاية هو محتاج من حبيبته إنها تدافع عن إستقلاليتها وإلا مكنتش هتفضل البنت إلي هو بيحبها

بمناسبة اليوم العالمي للمرأة يعني :)